Pinag-aaralan na ng Department of Transportation (DOTr) katuwang ang iba’t ibang ahensya ng pamahalaan ang posibilidad na dagdagan pa ang motorcycle lane sa EDSA.
Ito’y kasunod na rin ng dumaraming bilang ng mga motorsiklo na bumabaybay sa naturang pangunahing lansangan ng Metro Manila.
Ayon sa DOTr chief, batay sa isinagawa nilang pag-aaral ay tinatayang aabot sa 170,000 na mga motorsiklo ang bumabaybay sa EDSA araw-araw.
Kaya naman puspusan ang ugnayan sa pagitan ng DOTr at ng Metropolitan Manila Development Authority (MMDA) na maglagay ng motorcycle lane sa tabi ng kasalukuyang bicycle lane
Magugunitang itinalaga noon ng MMDA ang 3rd lane ng EDSA bilang motorcycle lane subalit hindi rin ito kadalasang nasusunod dahil sa kinakain din ito ng mga 4-wheeled vehicle.
Layon nito ani Bautista na matugunan ang matagal nang problema sa trapiko kung saan, bilyong-bilyong piso ang nawawala sa ekonomiya dahil dito. | ulat ni Jaymark Dagala
