Pag-aaralan ni Senate Committee on Basic Education Chairperson at Senador Sherwin Gatchalian kung paanong mairerekomenda sa Department of Education (DepEd) na mapaiksi ang transition sa pagbabalik sa dating school calendar.
Una nang nirerekomenda ni Gatchalian na ibalik na sa dati ang school calendar kung saan sa bakasyon ng mga estudyante mula Abril hanggang Mayo at sa Hunyo ang pasukan.
Ayon sa senador, ito ay para hindi na magtiis sa sobrang init na panahon ang mga estudyante at mga guro lalo’t umaabot na 40 degrees celsius ang heat index ngayon.
Aminado naman ang senador na hindi pwedeng gawin agad-agad ang pagbabalik sa dating school calendar dahil kung sakali ay magkakaroon ng isang taong walang break ang mga estudyante.
Naniniwala ang mambabatas na kung unti-unti nang ia-adjust ngayon ang school calendar ay makakabalik na sa dating schedule sa taong 2025. | ulat ni Nimfa Asuncion