Naibebenta na ng tobacco farmers sa mataas na presyo ang kanilang produkto sa mga buying station ngayong season.
Sa ulat ng National Tobacco Administration (NTA), kabilang sa mga produktong ito ay ang flue-cured Virginia tobacco leaves, at ang air-cured burley at native tobacco leaves.
Base sa latest monitoring ng NTA sa tobacco trading operations, umabot na sa P113 ang buying price kada kilo ng prime class ng tobacco o class AA ng flue-cured Virginia tobacco, na mas mataas kaysa sa aprubadong floor price na P97.
Inaasahan din ang pagtaas ng hanggang P100 kada kilo ang buying price ng prime class ng parehong air-cured burley-type tobacco at native-type na tobacco, na mas mataas sa inaprubahang P81 floor price.
Ayon kay NTA Administrator Belinda Sanchez, dahil sa tumataas na kalakaran sa actual buying price ng tabako asahan na raw na kikita ng malaki ang tobacco farmers ngayong panahon. | ulat ni Rey Ferrer
