Matapos ilabas ng korte ang Arrest Warrant ay nagkusa nang sumuko sa National Bureau of Investigation (NBI) ang negosyanteng si Cedric Lee.
Kasama si Lee sa apat na hinatulang guilty ng korte sa Taguig City sa kasong serious illegal detention for ransom na isinampa ng actor-TV host na si Vhong Navarro.
Ayon kay NBI Director Medardo de Lemos, may namagitan sa kampo ni Lee at ng NBI para ligtas na makasuko si Lee.
Agad naman itong sumalang sa booking procedures kasama ang pagkuha ng mugshot at fingerprint at ngayon ay nasa kustodiya ng NBI.
Hihintayin na lamang sa ngayon ng NBI ang susunod na kautusan ng korte kung saan ito ikukulong.
Sa verdict ng korte, hanggang 40 taong kulong ang sentensiya kina Lee, kasama pa si Deniece Cornejo, Ferdinand Guerrero, at Simeon Raz dahil sa pagdetine kay Navarro noong 2014. | ulat ni Merry Ann Bastasa
