Sa layuning maitaguyod ang digitalisasyon, sisimulan na rin ng Department of Social Welfare and Development (DSWD) ang pagpapatupad ng hybrid-digital payouts para sa Assistance to Individuals in Crisis Situation (AICS) program.
Ito ay sa bisa ng Memorandum of Agreement (MOA) na nilagdaan ng DSWD katuwang ang Land Bank of the Philippines (LBP).
Pinangunahan ni Secretary Rex Gatchalian at LBP President Lynette Ortiz at Vice President Atty. Nikolas Tolentino ang paglagda sa kasunduan.
Nakapaloob rito ang pagbuo ng isang hybrid digital payout system para sa mas mabilis at epektibong pamamahagi ng financial assistance sa mga benepisyaryo ng AICS.
Ayon sa DSWD, target nitong simulan ang pilot implementation ng hybrid-digital payouts sa ilang piling rehiyon kabilang ang Regions II (Cagayan), III (Central Luzon), IV-A (CALABARZON), at National Capital Region (NCR).
Ang AICS ay isa lang sa mga programa ng DSWD na layong makatulong sa mga nangangailangan at nahaharap sa krisis sa pamamagitan ng pagbibigay ng suportang medikal, funeral, transportation, at pagpapalibing. | ulat ni Merry Ann Bastasa
: DSWD
