Bumisita sina Senate President Juan Miguel Zubiri, Majority Leader Joel Villanueva at Deputy Majority Leader JV Ejercito kasama si Defense Secretary Gilberto Teodoro sa Pag-asa Island sa Palawan para personal na saksihan ang sitwasyon sa lugar.
Dito ay personal nilang nasaksihan kung gaano kalapit ang mga barko ng Chinese militia at coast guard sa isla na base sa pagtaya ng Philippine Navy ay nasa 3-4 nautical miles ang layo sa Pag-asa.
Ngayong araw, nasa 22 na Chinese militia, at Chinese Coast Guard vessel ang namataan ng mga senador sa paligid ng Pag-asa Island.
Kabilang naman sa mga aktibidad ng mga senador sa Pag-asa Island ang pagpapasinaya ng 2-storey navy barracks at isang Super Rural Health Unit.
Una na ring nagkaroon ng executive briefing ang mga senador kasama si SND Teodoro.
Nangako rin ang mga senador na sisikaping tugunan pa ang ibang mga pangangailangan ng mga taga-Kalayaan Island. | ulat ni Nimfa Asuncion