Mabilis na lumusot sa House Committee on Social Services ang panukalang batas na gawing isang ganap na batas ang Food Stamp Program.
Sa kasalukuyan kasi, isa lamang ito sa mg programang ipinatutupad ng Department of Social Welfare and Developmet (DSWD).
Sa isang panayam, sinabi ni DSWD Assistant Secretary Baldr Bringas, malaking bagay ang panukala na ito upang maging ganap na batas ang programa na layong makamit ang ‘Walang Gutom’ pagsapit ng 2027.
Batay na rin sa unang anunsyo ng DSWD, simula Hulyo ay palalakihin na ang programa kung saan itataas sa 300,000 ang magiging benepisyaryo.
Dahil sa madaragdagan ang benepisyaryo, magdadagdag din aniya sila ng retailers na magiging bahagi ng programa kung saan dito makakabili ng pang kain ang mga sakop ng programa.
Kasalukuyang dumadaan na aniya sa validation ang mga magiging benepisyaryo gayundin ang assessment sa dagdag na retailers.
Aminado naman si Bringas na kulang sila sa pondo sa ngayon.
Sa ilalim kasi aniya ng 2024 General Appropriations Act, mayroon lamang P1.89 billion na pondo ang programa na sasapat lang aniya sa 100,000 beneficiaries mula July hanggang December.
Kaya humihingi na aniya sila ng dagdag na pondo sa Department of Budget and Management para dito. | ulat ni Kathleen Forbes
