Target ni Ang Probinsyano party-list Rep. Alfred delos Santos na makapagbigay ng buwanang tulong pinansyal para sa mga lehitimong Persons with Disability.
Sinabi ito ng mambabatas kasabay ng pagpapaabot ng grocery packs at wheelchair sa may 100 PWD sa Quezon City.
Ayon kay Delos Santos, ta-trabahuin nila sa Kongreso na mabigyan ng P1,000 na buwanang financial aid ang mga may kapansanan.
Aniya, sa paraang ito ay matutulungan ang mga PWD na maibsan ang kanilang pang-araw-araw na gastusin.
“Tatrabahuin natin iyan sa Kongreso. Alam natin ang hirap ng isang magulang na may anak na PWD o isang ina na PWD na may anak. Sana po maipasa natin ang P1,000 per month assistance,” sabi ni Delos Santos.
Maliban dito ay makikipagtulungan din ang mambabatas sa lokal na pamahalaan ng Quezon City para naman mabigyan ng scholarship ang mga anak ng mga PWD.
Ayon kay QC Councilor Dorothy Delarmente, ang Quezon City ang pinakamalaking lungsod sa bansa na may higit 69,000 na PWD kaya’t anumang tulong ay malaking suporta na para sa naturang sektor. | ulat ni Kathleen Jean Forbes
