Ipinagluluksa ng Philippine National Police (PNP) ang pagpanaw ng isa nilang kasamahan matapos ang nangyaring engkuwentro sa Barangay Poblacion 2 sa Parang, Maguindanao del Norte kahapon.
Kinilala ng PNP ang nasawi na si Police Captain Roland Moralde, miyembro ng Regional Mobile Firce Company 14 sa Police Regional Office Bangsamoro Autonomous Region in Muslim Mindanao (PRO-BARMM).
Ayon sa PNP Public Information Office, nangyari ang insidente dakong alas-11 ng umaga kahapon nang sitahin ni Moralde ang isang nakilala sa pangalang Mohiden Ramalan Untal na may bitbit na baril habang naglilibot sa palengke.
Nagkaroon ng mainitang pagtatalo sa pagitan ng lalaki at ng pulis na nauwi sa engkuwentro na nagresulta naman sa malubhang pagkakasugat ng dalawa.
Nabatid na maliban kay Untal, may ilan pang lalaki ang lumutang sa kasagsagan ng engkuwentro.
Nagawa pang dalhin sa ospital si Moralde para mabigyan ng karampatang atensyong medikal subalit sa tindi ng tama ng bala ng baril sa kaniyang katawan ay hindi na nito kinaya pa at nalagutan ng hininga.
Dahil dito nagpaabot ng taos-pusong pakikiramay si PNP Chief, Police General Rommel Francisco Marbil sa naulilang pamilya ni Moralde at tiniyak nito ang malalimang imbestigasyon hinggil sa motibo ng kalunus-lunos na insidente. | ulat ni Jaymark Dagala
