Iginiit ni Senador Sherwin Gatchalian na may hawak na silang mga patunay ng partisipasyon ni Bamban Mayor Alice Guo sa operasyon ng malaking POGO hub sa kanilang lugar na na-raid at ipinasara na ng mga awtoridad.
Ayon kay Gatchalian, base sa mga dokumento at impormasyon na hawak ng senado ay makikita ang aktibong partisipasyon ni Guo sa POGO.
Kabilang na aniya dito na bago naging alkalde si Guo ay siya mismo ang naglakad ng mga permit at iba pang requirements para maitayo ang POGO sa lupang pagmamay-ari niya rin mismo.
Nang mahalal naman aniya ito bilang mayor ay pinirmahan nito ang mga building permit ng POGO.
Ibinahagi rin ni Gatchalian na may natatanggap siyang mensahe na may mga gustong tumestigo tungkol sa koneksyon ni guo sa POGO hub.
Sa kabila nito, sinabi ng senador na sa susunod na magiging pagdinig ng Senado tungkol sa isyu ay bibigyan nila ng panahon na makapagpaliwanag ang alkalde para maging patas dito. | ulat ni Nimfa Asuncion
