Naging epektibo ang transparency strategy ng Pilipinas sa paglalantad ng mga iligal na aktibidad ng China sa karagatan.
Ito ang inihayag ni Philippine Coast Guard Spokesperson Commodore Jay Tristan Tarriela sa isang ambush interview sa “Bagong Pilipinas” Media Engagement and Workshop sa Philippine Merchant Marine Academy (PMMA) sa San Narciso, Zambales ngayong Biyernes.
Paliwanag ni Tarriela, bago ilantad ng Pilipinas ang pangha-harass ng China sa West Philippine Sea, matagal na nilang ginagawa ito hindi lang sa Pilipinas kundi maging sa mga iba pang bansang may interes sa naturang karagatan, pero wala aniyang nag-iingay.
Sa matagal na panahon ay itinuturing lang ang pangha-harass na ito bilang “grey-zone tactics”.
Pero matapos na regular na iulat ng Pilipinas ang ginagawa ng China sa WPS ay nabunyag sa buong mundo ang tahasang paglabag ng China sa International Law, na kinondena ng maraming bansa. | ulat ni Leo Sarne