Dapat manindigan na rin ang iba pang mga bansang kasapi ng ASEAN laban sa mapangahas at agresibong hakbang ng China sa mga inaangkin nitong teritoryo sa karagatan.
Ito’y matapos mamataan ang tinaguriang “MONSTER SHIP” ng China Coast Guard (CCG) na umaali-aligid sa Exclusive Economic Zone (EEZ) hindi lamang ng Pilipinas kundi maging ng iba pang bansa gaya ng Vietnam at Malaysia.
Sa panayam kay Philippine Navy Spokesperson for the West Philippine Sea, Rear Admiral Roy Vincent Trinidad, kung hindi ito gagawin ng iba pang mga bansa sa ASEAN, maaaring matulad sila sa sinapit ng Pilipinas na itinataboy ng China sa sarili nitong teritoryo.
Una nang tiniyak ng Armed Forces of the Philippines (AFP) na patuloy ang ginagawang pagbabantay nito sa mga aktibidad ng China sa West Philippine Sea.
Kasabay din nito ang panawagan sa iba pang mga bansa lalo na sa China na igalang ang International Law at iwasan ang anumang makapagpapataas ng tensyon sa nasabing karagatan. | ulat ni Jaymark Dagala
