Mabilis na umaksyon at nagbigay ng tulog ang Philippine Coast Guard (PCG) matapos ang isang emergency na kinasasangkutan ng isang Chinese national.
Kinilala ang sangkot na Chinese national na si Zhang Donggou na sinasabing nagtamo ng pinsala sa ulo matapos mahulog sa accommodation B-deck ng Chinese Vessel na “Shi Dailo” sa baybayin ng Zamboanga City.
Ayon sa ulat, nang malaman ito ng National Maritime Center, kaagad na nakipag-coordinate ang PCG para sa maayos na medical evacuation patungo sa Brent Hospital kung saan nabigyan naman ito ng agarang atensyong medikal.
Habang patungo ng ospital, binigyan si Donggou ng paunang lunas ng mga naghatid ditong medical professionals kasama ang mga personnel mula sa iba’t ibang unit ng PCG.
Nagpapakita umano ang naganap na rescue operation, ayon sa PCG, sa diwa ng bayanihan ng mga Pilipino, gayundin ang kooperasyon at pakikiramay sa mga nagangailangan anuman ang nasyonalidad. | ulat ni EJ Lazaro