Pinapatiyak ni Senador Sherwin Gatchalian sa Toll Regulatory Board (TRB) na maayos at napapaganda pa ng mga toll operator, gaya ng North Luzon Expressway (NLEX) at South Luzon Expressway (SLEX), ang kanilang mga serbisyo bago magpatupad ng anumang dagdag singil.
Ito ay matapos aprubahan ng TRB ang ikalawang tranche ng toll adjustment para sa North Luzon Expressway (NLEX), na magreresulta sa mas mataas na toll rate para sa mga motorista simula June 4.
Ayon kay Gatchalian, bilang laging gumagamit ng NLEX ay alam niya mismo ang sitwasyon gaya ng mga reklamo sa sirang cashless reader at matinding trapiko lalo na tuwing weekend o holiday.
Aniya, dapat munang ayusin ng mga operator ng mga toll road na ito ang kanilang mga depektibong cashless system at magpatupad ng programa na magpapagaan sa daloy ng trapiko bago magsagawa ng anumang pagtataas ng singil
Giniit ng mambabatas, na anumang pagtaas ng singil sa mga pangunahing toll road sa bansa ay dapat magresulta sa mas mataas na pamantayan ng serbisyo, at mas magandang karanasan para sa mga motorist. | ulat ni Nimfa Asuncion
