Matagumpay na naiuwi ng Philippine Coast Guard (PCG) ang dalawang mangingisda na nasugatan matapos sumabog ang kanilang bangka sa West Philippine Sea kahapon.
Alas-4:47 ng umaga kanina nang maihatid ng BRP Sindangan ang dalawang sugatang mangingisda sa Subic Bay Freeport.
Agad din silang dinala sa ospital para masuri ng mga doktor matapos magtamo ng 2nd degree burn.
Nangyari ang insidente kahapon sa Bajo de Masinloc, Zambales habang ang mga mangingisda ay naghahanap-buhay.
Muntik pang harangin ng China Coast Guard ang rescue team ng PCG at nagawa pang mag-radio challenge habang lumalapit sa mga sugatang mangingisda. | ulat ni Mike Rogas
📸: PCG
