Sa pamamagitan ng turnover ceremony ay opisyal nang ipinasakamay ng Department of Labor and Employment (DOLE) Central Pangasinan Field Office ang livelihood project para sa animnapu’t tatlong (63) bangus deboner sa Dagupan City, Pangasinan.
Binubuo ang mga benepisyaryong nabanggit ng dalawampu’t limang bangus deboner mula sa Barangay ng Pantal, at tatlumpu’t walong bangus deboner mula sa Barangay Bonuan Gueset.
Pinangunahan ang naganap na ceremony nina DOLE Central Pangasinan Field Office Head Agnes Aguinaldo, Dagupan City Mayor Belen Fernandez, at PESO Dagupan Manager Joy Siapno.
Naisakatuparan ang livelihood project sa ilalim ng Assisted Livelihood Project ng DOLE. Ang proyekto ay kinabibilangan ng mga ginagamit sa bangus deboning, gayundin sa mga sangkap upang makagawa ng boneless bangus na siyang ipinagmamalaking produkto ng lungsod ng Dagupan.
Sa naging mensahe ni Mayor Fernandez, nagpasalamat ito kay Pangulong Ferdinand R. Marcos Jr. at sa pamunuan ng DOLE sa ibinigay na proyekto sa kanilang mga residente.
Hinimok rin ni Fernandez ang mga bangus deboner na panatilihin ang kalidad ng mga boneless bangus at panatilihin ang kalinisan sa paggawa nito.| ulat ni Ricky Casipit| RP1 Dagupan