Nanawagan ngayon ang Cybercrime Investigation and Coordinating Center (CICC) at Scam Watch Pilipinas sa publiko na gamitin ang eGov app ng Department of Information and Communications Technology (DICT) para mag-report ng mga natatanggap na text scams.
Ayon kay CICC Executive Director Undersecretary Alexander Ramos, bukod sa pagtawag sa Inter-Agency Response Center (I-ARC) Hotline 1326, ay maaari ring magsumbong ang mga nabibiktima ng text scams sa eReport feature na makikita sa eGov app.
Dito ia-upload ang screenshot ng natanggap na scam message.
Ang mga natatanggap na datos naman ng eGov app ay isinasailalim sa imbestigasyon ng CICC at pinapadala sa National Telecommunications Commission (NTC).
Bukod sa text scams, maaari ring isumbong sa naturang app ang mga insidente ng child abuse, red tape, sunog, at iba pa.
Una na ring sinabi ng CICC na maghahain ito ng reklamo laban sa mga telco na hindi namo-monitor ang mga unregistered SIM Cards at nagagamit ito pang-scam. | ulat ni Merry Ann Bastasa
