Ipinag-utos na ng Department of Human Settlements and Urban Development (DHSUD) sa Key Shelter Agencies (KSAs) na magpatupad ng moratorium sa monthly payments ng kanilang benepisyaryo na naapektuhan ng Bagyong Carina.
Sa kanyang Memorandum, inatasan ni DHSUD Secretary Jose Rizalino Acuzar ang Home Development Mutual Fund o Pag-IBIG Fund, National Housing Authority, Social Housing Finance Corporation at ang National Home Mortgage Finance Corporation na bigyan ng isang buwang moratorium sa bayarin ang mga benepisyaryo.
Ang hakbang ng DHSUD ay alinsunod sa direktiba ni Pangulong Ferdinand R. Marcos Jr. na bigyan ng kinakailangang tulong ang mga pamilya.
Bukod sa moratorium, inihahanda na rin ng Social Housing Finance Corporation ang 9,132 relief packs para ipamahagi sa mga apektadong pamilya sa kanilang project sites.
Una nang inanunsyo ng Pag-IBIG Fund ang paglalaan ng ₱3 billion na calamity loans para sa mga miyembro.
Gayundin ang pag-deploy ng Pag-IBIG on-wheels mobile offices sa affected areas para maghatid ng frontline services sa mga tao. | ulat ni Rey Ferrer
