Ginawa nang bagong processing center ng Pag-Abot Program ng Department of Social Welfare and Development ang dating Philippine Overseas Gaming Operations (POGO) firm sa Pasay City.
Nagsagawa kanina ng site visit sina DSWD Secretary Rex Gatchalian at Pasay City Mayor Emi Calixto-Rubiano sa processing center na may anim na palapag, sa kahabaan ng Williams Street.
Bukod sa pagiging processing site ang dating POGO Hub, magsisilbing transient shelter ito para sa mga pamilya at indibidwal na nasa lansangan bago sila makabalik sa kani-kanilang mga lalawigan.
Kasama sa mga pasilidad ang isang child-friendly space, isang medical clinic, at isang processing area kung saan ang mga social worker ay maaaring magsagawa ng mga pamamaraan sa paggamit, profiling, mga panayam, at pagtatasa.
Naglagay din ng espasyo para sa pagpaparehistro ng mga naabot na indibidwal sa Philippine Identification System (PhilSys).
Sa kasalukuyan, ang pasilidad ay tumutugon sa mga pangangailangan ng humigit-kumulang 60 naabot na mga indibidwal na dating nakatira sa mga lansangan.| ulat ni Rey Ferrer
