Nakikipagpulong na ang Department of Social Welfare and Development sa National Economic and Development Authority (NEDA) para sa posibleng pagkakaroon ng adjustment sa cash grant na ibinibigay sa mga benepisyaryo ng Pantawid Pamilya Pilipino Program (4Ps).
Sa DSWD Forum, sinabi ni Assistant Secretary JC Marquez, tagapagsalita ng DSWD na pinaplantsa pa nila kung ilang porsyento ang maaaring itaas sa natatanggap na ayuda ng 4Ps beneficiaries.
Kung sakali namang maaprubahan ito, maaaring sa susunod na taon pa maisama ang umento sa ayuda.
Kaugnay nito, kasama rin sa pinag-aaralan ang mekanismo para maging otomatiko na ang adjustment ng cash grant sa 4Ps lalo na kung mataas ang inflation.
Tugon ito sa direktiba ni Pangulong Ferdinand R. Marcos Jr. na pag-aralan ang mga paraan partikular na sa Pantawid Pamilyang Pilipino Program (4Ps) na tumugon sa epekto ng inflation sa mahihirap na Pilipino. | ulat ni Merry Ann Bastasa
