Kumpiyansa si House Committee on Labor and Employement Chair Fidel Nograles na makakamit ng pamahalaan ang target na tatlong milyong bagong trabaho sa pagtatapos ng termino ni Pangulong Ferdinand R. Marcos Jr. sa 2028.
Aniya handa ang Kamara na makipagtulungan sa administrasyon para mapatotoo ang adhikaing ito na mas marami pang Pilipino ang magkaroon ng marangal na pamumuhay.
Matatandaan na sa ginanap na 2024 National Employment Summit, inihayag ni Pangulong Marcos na sa pamamagitan ng pagpapatupad sa 10-year national employment masterplan sa ilalim ng Trabaho Para sa Bayan Act ay makakalikha ng tatlong milyong bagong trabaho hanggang 2028.
Sinang-ayunan naman ito ni Nograles.
Aniya, susi ang maayos na implementasyon ng TPB plan para sa target na tatlong milyong trabaho.
Kaya mahalagang magtulungan ang buong pamahalaan upang masiguro na masusunod ang mga probisyon na nakalatag dito.
Kinilala din ng mambabatas na nasa tamang direksyon ang pamahalaan bunsod na rin ng pagtaas sa employment rate at pagbaba naman sa unemployment rate. | ulat ni Kathleen Jean Forbes
