Nilinaw ng Manila Electric Company o Meralco na walang convenience fee ang pagbabayad gamit ang Bayad e-wallet sa Meralco Online website at app.
Ayon kay Meralco Vice President at Head of Corporate Communications Joe Zaldarriaga, ang Meralco ay hindi kumikita sa convenience fee na sinisingil sa mga customer na gumagamit ng ibang payment options tulad ng GCash, Maya, at mga credit card.
Ani Zaldarriaga, ang convenience fee para sa ibang providers ay napupunta sa kanilang mga payment partners. Hindi aniya sila kumikita kahit isang sentimo mula sa mga convenience fee na ito, taliwas sa mga maling pahayag.
Paliwanag pa ng opisyal ang mga convenience fee na ito ay sinisingil ng mga bangko at card networks, at pinoproseso lamang ng Meralco.
Pinaalalahanan din ng Meralco ang publiko na ang Meralco Online ay isa lamang sa maraming paraan ng pagbabayad ng bill. Maaaring pumili ang mga customer ng iba pang payment option na convenient para sa kanila. | ulat ni Diane Lear
