Inilunsad ng Metropolitan Manila Development Authority (MMDA) ang kanilang pinahusay na Communications and Command Center (CCC).
Layon nitong mas maging epektibo ang pagresponde sa mga sakuna, kalamidad, at iba pang emergency situation sa Metro Manila.
Ang bagong CCC ay nilagyan ng mga makabagong teknolohiya tulad ng surveillance at monitoring system, smart-enabled devices, at isang advanced multi-display video wall system.
Sa pamamagitan nito, mas mabilis na makakalap at maaanalisa ng mga opisyal ang mga impormasyon na mahalaga sa paggawa ng desisyon at pagpaplano ng aksyon.
Ayon kay MMDA Acting Chairman Atty. Don Artes, ang CCC ang magsisilbing “nerve center” ng ahensya para sa information management at decision-making, lalo na pagdating sa traffic control, disaster response, at public safety.
Dumalo sa paglulunsad sina Department of National Defense Secretary Gilbert Teodoro, incoming Education Secretary Sonny Angara, at iba pang opisyal ng MMDA.
Samantala, kasabay nito ay isinagawa rin ng MMDA ang groundbreaking ceremony para sa kanilang limang palapag na Annex Building sa kanilang tanggapan sa Pasig City. | ulat ni Diane Lear
