Walang ginawang paglabag ang Senado sa pagsasapubliko ng records ni suspended Bamban, Tarlac Mayor Alice Guo ayon kay Senador Sherwin Gatchalian.
Tugon ito ng senador sa reklamo ng kampo ni Guo, na nilabag umano ng Mataas na Kapulungan ang karapatan ng alkalde sa paglalabas ng mga detalye ng mga ari-arian nito.
Pero giit ni Gatchalian, walang naging paglabag dahil ang kaso na inihain sa Court of Appeals (CA) ay maituturing nang public record.
Katunayan, kahit sino aniya ay maaaring kumuha ng kopya ng petisyong inihain ng Anti-Money Laundering Council (AMLC) kaugnay ng pag-freeze ng assets ni Guo, kung saan ang petisyong ito ay naglalaman ng bank account details, assets at ang mga halaga nito.
Dinagdag rin ng senador, na hindi trial by publicity ang ginagawa nilang pagsasapubliko ng mga detalyeng ito dahil ang layon nila ay malaman ng taumbayan ang estado ng kaso sa AMLC. | ulat ni Nimfa Asuncion
