Hindi totoong lumaki sa farm at hindi totoong homeschooled si suspended Bamban, Tarlac Mayor Alice Guo ayon kay Senador Sherwin Gatchalian.
Sinabi ni Gatchalian na ito ay base sa mga dokumento na ipinapaabot sa kanya mula nang lumabas ang totoong pagkatao ni Guo.
Sa pagpapatuloy ng pagdinig ng Senate Committee on Women kaugnay sa POGO operations, binahagi ni Gatchalian na kabilang sa mga dokumentong ito ay ang school records ni Guo kung saan lumitaw na nag-aral ito sa paaralan ding pinasukan ni Gatchalian na Grace Christian High School.
Natuklasan na sa naturang paaralan nag Grade 1 hanggang Grade 3 si Guo mula taong 2000 hanggang 2003.
Naka—attach din aniya sa school records ni Guo ang kanyang Alien Certificate of Registration na match din sa dokumentong hawak ng Bureau of Immigration.
Gayundin ang kanyang birth certificate na mula sa China at nakatranslate sa English ang mga nilalaman.
Nakasaad dito na ang nanay niya ay Wen Yi Lin at ang tatay niya ay si Guo Jian Zhong.
Samantala, nangako ang Office of the Solicitor General na isasama nila ang dokumentong ito sa ihahain nilang quo warranto case laban kay Guo.| ulat ni Nimfa Asuncion
