Ikinalugod ng ilang mambabatas ang ibinabang guilty verdict ng korte sa tatlong dating kadete ng Philippine Military Academy (PMA) na sangkot sa pagkamatay ng plebe na si Darwin Dormitorio.
Ayon kay Cagayan de Oro City 2nd District Representative Rufus Rodriguez na kababayan ni Dormitorio, isa itong tagumpay para sa pagkamit ng hustisya.
Naniniwala naman ang mambabatas na ang pagkamatay ni Dormitorio at ang naging desisyon ng korte ay sapat nang dahilan para tuluyang ipagbawal ng Armed Forces of the Philippines (AFP) ang hazing at kahalintulad na aktibidad sa loob at labas ng PMA.
“I know that Gen. Brawner actively pushed a campaign against hazing during his time in PMA. He should now impose a strict ban,” saad niya.
Dapat din aniyang panagutin ang PMA superintendent, commandant ng mga cadets, at junior officers na may hawak sa mga kadete kung mapatunayan na mayroong hazing activity.
Muli naman iginiit ni Bagong Henerasyon Party-list Representative Bernadette Herrera na magiging epektibo lang ang Anti-Hazing Law kung tunay na may mapapanagot.
Umaasa rin ang lady solon na makakuha ng paborableng desisyin ang iba pang hazing cases gaya ng kaso ni Atio Castillo.
“The Atio and Darwin cases took years. I wish justice were swifter but the accused are influential, powerful, and monied, so justice can be delayed. We will continue to push all hazing cases. There are many of these cases still pending, so we call on the Department of Justice and Philippine National Police to make frequent public updates on each of these hazing cases,” ani Herrera. | ulat ni Kathleen Jean Forbes
