Magbibigay ng cash incentives ang Pamahalaang Lungsod ng Pasig sa mga honor student ng lungsod na nagtapos o magtatapos ngayong taon.
Sa abiso ng Pasig Scholarship Office, ₱30,000 ang kanilang ibibigay sa magsu-Summa Cum Laude, ₱25,000 para sa mga Magna Cum Laude, at ₱20,000 para sa mga Cum Laude.
Para naman sa mga Valedictorian/Gold Medalist, makatatanggap sila ng ₱10,000 habang ₱5,000 para sa Salutatorian/Silver Medalist.
Nagsimula na ang aplikasyon para sa nasabing programa at tatagal ito hanggang August 16, 2024.
Dalhin lamang ang mga requirement gaya ng Certified True Copy ng diploma o Certificate of Honors na natanggap, digital copy ng graduation picture, kopya ng pinakahuling scholarship application form, at sagutan ang form na makikita sa official Facebook page. | ulat ni Jaymark Dagala
