Nagpahayag ng buong suporta si Quezon City Mayor Joy Belmonte sa matibay na paninindigan ni Secretary Benhur Abalos laban sa child abuse, sexual abuse, at human trafficking.
Sa isang pahayag, sinabi ng alkalde na mahalagang maging mapagbantay sa mga nagsasamantala sa kahinaan at kahirapan ng ilan nating mga kababayan, lalo na ng mga kabataan at kababaihan.
Dapat rin aniyang matiyak na mapapanagot sa batas ang gumagawa ng ganitong krimen at mabigyan ng katarungan ang kanilang biktima.
Giit ni Mayor Joy, walang lugar sa lipunan at dapat silang mabulok sa kulungan ang mga abusado.
“Sa ngalan ng lahat ng QCitizens, kasama tayo sa kampanyang ito ni Secretary Abalos para sa mas ligtas at payapang lipunan para sa kasalukuyan at darating pang mga henerasyon,” ani Mayor Belmonte. | ulat ni Merry Ann Bastasa
