Binigyang diin ni Senate President Pro Tempore at Senate Committee on Defense chairman Senador Jinggoy Estrada na walang basehan ang inihaing diplomatic protest ng China laban sa pamamalagi ng BRP Teresa Magbanua sa Escoda Shoal.
Base kasi sa protesta ng China, itinuturing nilang ‘illegal anchoring’ ang ginawa ng sasakyang pandagat ng Philippine Coast Guard (PCG) dahil ito anila ay seryosong paglabag sa soberanya ng kanilang bansa.
Ayon kay Estrada, bahagi ng exclusive economic zone (EEZ) ng Pilipinas ang Escoda Shoal alinsunod na rin sa itinatakda ng international law kaya hindi maituturing na infringement o panghihimasok sa kanilang teritoryo ang pamamalagi doon ng BRP Teresa Magbanua.
Giniit ng senador na kung tutuusin, ang China ang nanghihimasok sa ating EEZ.
Katunayan, apat na buwan na aniyang naka istasyon sa naturang lugar ang BRP Teresa Magbanua bilang tugon sa pinaghihinalaang reclamation activities ng China doon.
Dinagdag pa ni Estrada na mukhang ang pangunahing layunin ng China ay ang makuha ang ganap na kontrol sa Escoda Shoal sa pamamagitan ng kanilang Chinese Coast Guard vessels at maritime militia.
Sa huli, nanawagan ang mambabatas sa China na respetuhin ang boundaries ng Pilipinas at makibahagi sa mapayapang pakikipagdayalogo para maresolba ang mga hindi pagkakaunawaan.| ulat ni Nimfa Asuncion
