Inamin ni Shiela Guo na kasama niyang lumabas ng Pilipinas ang kanyang mga kapatid na sina dating Bamban, Tarlac Mayor Alice Guo at si Wesley Guo.
Sa pagdinig ng Senate subcommittee on justice, inilahad ni Shiela na gabi noong unang linggo ng Hulyo ay sinundo silang tatlo ng isang van mula sa kanilang farm sa Tarlac at halos limang oras silang nag-land travel.
Matapos nito, mga hatinggabi ay sumakay na sila ng isang maliit na puting bangka.
Mag-uumaga na nang lumipat rin sila sa malaking barkong pangisda at saka lumipat muli at sumakay sa isang blue o green na bangka patungong Malaysia.
Samantala, sa isang dokumento mula sa Bureau of Immigration (BI), napag-alamang may petsang July 18, 2024 ang arrival stamp ni Shiela Guo sa Malaysia.
Mula Malaysia ay nagtungo pa sila sa Singapore at saka pumunta ng Indonesia.
Sa ngayon ay hindi na aniya alam ni Shiela kung nasaan ang kanyang kapatid na si dating Mayor Alice Guo dahil nagkahiwa-hiwalay na sila pagdating ng Indonesia.
Sinabihan daw siya ng kapatid na si Alice na huwag nang magtanong at huwag nang alamin kung saan siya pupunta
Sinabi pa ni Shiela na may balak pa sana silang bumalik sa Singapore tapos ay didiretso sa Hong Kong pero hindi na ito natuloy dahil nahuli na siya sa Indonesia. | ulat ni Nimfa Asuncion
