Sinabi ni Shiela Guo na hindi sila tunay na magkapatid ni dating Bamban Tarlac Mayor Alice Guo.
Sa pagdinig ng Senado, binahagi ni Shiela na hindi niya tunay na tatay si Jian Zhong Guo o si Angelito Guo na siyang ama rin ni Alice Guo.
Sa salaysay ni Shiela, nasa China ang tunay niyang ama samantalang tita lang niya ang kinakasama ni Jian Zhong Guo na si Wen Yi Lin.
Inamin rin ni Shiela na hindi siya dito sa Pilipinas ipinanganak kundi sa China.
Dumating raw siya rito sa bansa noong taong 2001, nung siya ay 16 o 17 years old, dahil nagpatulong ang kanilang ‘daddy’ sa kanilang negosyo dito sa Pilipinas.
Ipinunto ni Senadora Risa Hontiveros na sa record ng Philippine Statistics Authority (PSA), nakita na ang late registration ng kapanganakan nina dating Mayor Alice at Shiela Guo ay ni-register noong November 2, 2005 at nakasaad na sina Angelito Guo at Amelia Leal Guo na kapwa Pilipino ang kanilang mga magulang.
Sinabi naman ni Shiela na wala silang alam sa birth certificate dahil daddy nila ang nagrehistro nito.
Sinabihan lang aniya siyang ito na ang gamitin kapag babiyahe sa ibang bansa.
Sa parehong pagdinig, binahagi rin ni Shiela na girlfriend ng isa pa nilang kapatid na si Wesley Guo si Cassandra L Ong.
Noong una ay sinabi ni Shiela na unang beses niyang nakita si Ong sa Malaysia pero base sa dokumentong pinakita ni Senador Sherwin Gatchalian ay napatunayang bumiyahe na silang magkakasama noong February patungong Taipei Taiwan.
Samantala, kahit humarap sa hearing ngayon, hindi pa pinakawalan si Guo mula sa detension ng Senado dahil kailangan pa nitong humarap sa mga pagdinig ng Senate Committee on Women tungkol sa mga POGO.| ulat ni Nimfa Asuncion
