Ginawaran ng mataas na kapulungan ng Senate Medal of Excellence ang tatlong atletang Pinoy na nakakuha ng medalya sa katatapos lang na 2024 paris summer Olympics.
Personal na dumalo sa sesyon ng Senado ngayong araw sina 2024 Olympics double gold medalist Carlos Yulo at bronze medalists Nesthy Petecio at Aira Villegas para tanggapin ang medalya.
Maliban sa medalya, nagbigay rin ng cash incentives ang mga senador.
Tig P1.5 million para sa bawat gold medal ni Yulo kaya nabigyan ito kabuuang P3 million habang tig isang milyong piso naman ang natanggap nina Petecio at Villegas.
Kinilala rin ng Mataas na Kapulungan ang buong Team Philippines na nakilahok sa 2024 Olympics.
Una nang pinagtibay ng Senado ang Senate Resolution 1128 na layong kilalanin ang impressive performance ng Philippine team.
Dito kinikilala at nagpapasalamat ang mga senador sa mga buong team para sa pagpapakita ng husay sa kani kanilang mga larangan at pagiging inspirasyon sa mga kabataan.| ulat ni Nimfa Asuncion