Posibleng pumasok sa Philippine Area of Responsibility (PAR) sa susunod na linggo ang bagong binabantayang Low Pressure Area (LPA) ng PAGASA.
Ito ay tatawaging Ferdie kapag naging ganap na bagyo.
Sa Bagong Pilipinas Ngayon, sinabi ni PAGASA weather forecaster Ana Clauren-Jorda na hindi inaasahang direktang makakaapekto ito sa bansa.
Ngunit palalakasin nito ang Southwest Monsoon o hanging habagat na muling magpapaulan sa Luzon kasama na ang National Capital Region.
Bukod dito, mayroon ding isa pang namuong LPA na binabantayan ng PAGASA na posibleng pumasok sa PAR sa kalagitnaan ng Setyembre.
Samantala, bukas ay inaasahang gaganda na ang lagay ng panahon at sisikat na ang araw ngunit makararanas pa rin ng mga localized thunderstorm sa hapon o gabi. | ulat ni Diane Lear
