Umapela ang Commission on Elections (Comelec) sa Senado kaugnay ng pagkakabawas ng kanilang panukalang pondo para sa susunod na taon.
Sa pagdinig ng panukalang 2025 budget ng Comelec, sinabi ni Comelec Chairperson George Garcia, na mula sa P49.749 billion na hinihiling nilang pondo para sa susunod na taon, P35.47 billion lang ang naibigay sa kanilang alokasyon sa ilalim ng 2025 National Expenditure Program (NEP).
Paliwanag ni Garcia, dahil sa budget cut na ito ay parehas maaapektuhan ang national and local elections na gagawin sa May 2025, at ang barangay at Sangguniang Kabataan (SK) elections na gagawin naman sa December 2025.
Sa nabawas na pondo, P3 billion sana ang para sa midterm elections kung saan P1.4 billion para sa training ng mga guro habang ang natitirang balanse ay para sa forms, supplies at voters’ education.
Samantalang P8 billion naman ang natapyas para sa barangay at SK elections, na gagamitin rin sana sa pag eempleyo ng support staff sa mga presinto at honoraria para sa guro. | ulat ni Nimfa Asuncion
