Naging mahigpit sa paghimay ang Commission on Elections (COMELEC) sa accreditation ng mga party-list organizations para sa 2025 Midterm Elections.
Ayon kay COMELEC Chairperson George Erwin Garcia, ito ang dahilan kung bakit nasa 142 na aplikasyon ang rejected o ibinasura ng komisyon habang 41 ang tinanggap bilang bagong party-list organizations.
Paliwanag nito, kasama sa dahilan ng pagbasura sa aplikasyon ng karamihan ay dahil sa hindi naman tunay na kinakatawan ng mga ito ang mga marginalized at underrepresented sector.
Marami din aniya ang nagpresenta na kulang naman ang dokumento habang ang iba ay peke pa.
Maaari pa rin naman aniyang magsumite ng Motion for Reconsideration ang mga ito o magtungo sa Korte Suprema.
Kasunod nito, muli namang nanawagan ang COMELEC sa publiko na humabol na sa registration bago pa ang deadline sa September 30. | ulat ni Merry Ann Bastasa
