Binigyang-diin ni Department of Migrant Workers Secretary Hans Leo Cacdac na kasalukuyan silang naghihigpit sa mga Filipino seafarers na maglayag sa mga lugar na mataas ang peligro.
Sa pagharap ni Cacdac sa House Appropriations Committee para sa kanilang 2025 proposed budget sinabi nito na alinsunod sa atas ni Pangulong Ferdinand Marcos Jr. prayoridad nila na protektahan ang buhay ng mga Pilipinong marino at kanilang mga pamilya.
Aniya, kabilang sa paghihigpit na ito ay hindi nila pinapayagan ang mga Pinoy seafarers na sumakay sa barkong naging target na ng 40 pag-atake sa high-risk areas.
Sa ngayon aniya, limang ship owners na naglalayag sa Red Sea at Gulf of Aden ang pinagbabawalan nilang sakyan ng mga Filipino seafarers dahil sa tatlong pangunahing kaso gaya ng hinostage ito sa port of Hodeida,Yemen kung saan dalawang Pilipino ang namatay habang ang iba ay nawawala pa sa ngayon.
Aniya, base sa international shipping community, 70% ng international ships ay umiiwas nang dumaan sa high-risk areas upang matiyak ang kaligtasan ng kanilang crew members. | ulat ni Melany Valdoz-Reyes
