Walang patid na ang pamamahagi ng tulong ng Department of Social Welfare and Development (DSWD) sa mga sinalanta ng bagyong Enteng at Habagat.
Sa ulat ng DSWD Field Office-CALABARZON, may 198 pamilya o 857 indibidwal sa Kabisig Elementary School sa Barangay San Andres sa Cainta, Rizal ang hinatiran ng family food packs ngayong araw.
Ang pamamahagi ng food packs ay kasabay ng pagbisita ni DSWD Secretary Rex Gatchalian para tingnan ang kalagayan ng evacuees.
Nauna nang binisita ng kalihim ang evacuation center sa Antipolo City at pinangunahan ang pamamahagi ng relief at financial aid sa evacuees.
Nasa 107 pamilya o 369 indibidwal ang pansamantalang nanunuluyan sa Jesus S. Cabarus Elementary School sa Barangay San Jose, Antipolo City.
Bukod sa pinamigay na food packs, binigyan din ng P10,000 financial aid ang mga pamilya sa ilalim ng Assistance to Individuals in Crisis Situation (AICS). | ulat ni Rey Ferrer
