Isang karangalan para sa Philippine Charity Sweepstakes Office (PCSO) ang pagkakahalal ni General Manager Mel Robles bilang miyembro ng Executive Committee ng Asia Pacific Lottery Association (APLA).
Ayon sa PCSO, nahalal si Robles sa ginanap na 2024 APLA Regional Conference sa Hanoi, Vietnam. Siya ang kauna-unahang Pilipino na naging bahagi ng Executive Committee ng APLA.
Sa isang panayam, nagpapasalamat si Robles sa pagkakahirang sa posisyon na nangangahulugan aniya na kinikilala at pinahahalagahan ng kaniyang mga kapwa lider sa gaming ang mga inisyatibo na ipinatutupad sa PCSO.
Ang APLA ay isang samahan ng mga lottery operator at supplier sa Asia-Pacific region. Ito ang kumakatawan sa interes ng rehiyon sa larangan ng lotto at paglalaro. Ang mga bagong halal na opisyal ay magsisilbi sa loob ng dalawang taon hanggang sa susunod na Annual General Assembly (AGM) sa September 2026. | ulat ni Diane Lear
