Pinatitiyak ng MAKABAYAN bloc na mapanagot si Apollo Quiboloy sa lahat ng kasong inihain laban sa kaniya.
Kasunod na rin ito ng kumpirmasyon ng Philippine National Police (PNP) na nasa kustodiya na nila si Quiboloy at apat na iba pang akusado.
Ayon kay Gabriela Party-list Representative Arlene Brosas, maituturing na heinous crimes ang child at sexual abuse at human trafficking na kaso ni Quiboloy at dapat maibigay ang hustisya sa kaniyang mga biktima.
Kasama rin aniya sa dapat imbestigahan ay ang mga tumulong sa kaniya na magtago.
“The arrest of Apollo Quiboloy is long overdue and marks a significant step towards justice for his victims. However, the government must not only focus on Quiboloy but also investigate those who aided him during his time in hiding… Let this be a reminder to Quiboloy that he is not a God. Harapin niya ngayon ang taumbayan,” giit ni Brosas.
Paalala naman ni Kabataan Party-list Representative Raoul Manuel na unang hakbang pa lang sa pagkamit ng hustisya ang pagkakahuli kay Quiboloy.
Dapat din aniya panagutin ang mapapatunayang sangkot sa pagprotekta sa kaniya.
“Dapat bantay-sarado tayo ngayon para tiyaking mananagot ang mga tulad ni Quiboloy. Additionally, dapat ding imbestigahan at panagutin ang mga tumulong sa pagtatago ni Quiboloy… Ang pag-aresto kay Quiboloy ay first step pa lamang at hindi pa ganap na pagbibigay ng hustisya sa lahat ng biktima niya,” wika ni Manuel.
Maliban naman sa mga kaso sa Pilipinas dapat din harapin ni Quiboloy ang mga kaso niya sa labas ng bansa ayon kay ACT Teachers Party-list Representative France Castro.
Kailangan din aniya na mabilis na gumulong ang hustisya para sa mga biktima.
“The arrest of Apollo Quiboloy must lead to his full accountability before the law. The charges against him, both in the United States and the Philippines, are grave and demand thorough investigation and prosecution,” ani Castro. | ulat ni Kathleen Jean Forbes
