Isinulong ng Philippine Navy (PN) at Royal Malaysian Navy (RMN) ang kanilang “maritime security collaboration” sa pamamagitan ng pagdaraos ng ika-26 na “Navy-to-Navy Talks.”
Ang Philippine Navy ang nag-host ng pagpupulong na isinagawa sa Manila Peninsula Hotel noong Miyerkules.
Ang pag-uusap ng mga opisyal ng dalawang hukbong pandagat ay pinangunahan ni PN Vice Commander, Rear Admiral Jose Ma. Ambrosio Ezpeleta PN at Rear Admiral Farizal Myeor, ang Assistant Chief of Staff for Operations and Training ng RMN.
Ayon kay Philippine Navy Spokesperson Commander John Percie Alcos, itinuturing ng PN ang kanilang partnership sa RMN na mahalaga sa pagsulong ng regional stability, pagtiyak ng maritime safety at pangangalaga ng maritime interests ng dalawang bansa.
Kapwa nanindigan ang PN at RMN na isulong ang mas malapitang relasyong pandepensa para sa benepisyo ng pangkalahatang regional maritime community. | ulat ni Leo Sarne
📸: Philippine Navy
