Inabot hanggang sa task force bravo ang sunog na sumiklab sa isang residential area sa Vitas, Gagalangin, Tondo sa Lungsod ng Maynila ngayong araw.
Sinasabing nagsimulang sumiklab ang sunog bandang 11:44 ng umaga bago magtanghali pero makalipas lamang ang halos kalahating oras ay agad na inilagay sa pangunguna ni Fire Senior Inspector Ignacio sa Task Force Alpha ang sunog sa Tondo.
Ayon sa BFP NCR, kabilang na sa mga nasunog ay ang mga building 27 at 23 sa may Vitas na residential area malapit sa North Harbor sa Maynila.
Bandang 1:33 naman hapon ay itinaas na rin sa Task Force Bravo ng Bureau of Fire Protection (BFP) ang sunog dahilan upang magdatingan na rin pati ang ilang fire trucks mula sa mga kalapit na lungsod ng Maynila at tumulong na rin ang chopper ng Philippine Air Force na may dalang bambi bucket upang makatulong sa pag-apula ng apoy.
Sa ngayon wala pang impormasyon kung may mga nasaktan o nasugatan dahil sa nagaganap na sunog.
Patuloy naman ang mga residente sa lugar sa pagbabantay ng mga nabitbit nilang mga gamit, mga alagang hayop, at anumang naisalba palayo sa nangangalit na apoy.
Hindi na rin nakakagalaw ang trapiko sa Road 10 partikular ang patungong northbound dahil sa sunog at mga trak na bumibiyahe ngayong araw.| ulat ni EJ Lazaro
