Pinagbigyan ng Valenzuela Regional Trial Court Branch 282 ang hiling ni Senate Committee on Women Chairperson Risa Hontiveros na paharapin si dating Bamban Mayor Alice Guo sa pagdinig ng kanyang komite bukas tungkol sa operasyon ng mga iligal na POGO.
Sa kautusang inilabas ng Valenzuela court, inatasan ni Judge Elena Amano ang Pambansang Pulisya na dalhin si Guo sa Senado bukas ng alas-9 ng umaga at ang pagpapatupad ng mahigpit na security protocol para kay Guo.
Napunta sa sala ni Judge Amano ang dalawang graft cases ng dating alkalde na orihinal na isinampa sa Capas, Tarlac RTC.
Ipinalipat ang kaso matapos makwestyon ang hurisdiksyon ng Capas court dahil nasa lalawigan ito kung saan dating alkalde si Guo. | ulat ni Nimfa Mae Asuncion
