Ipina-contempt at ipinaaaresto na ng Quad Committee ang asawa ni dating Presidential Spokesperson Harry Roque na si Myla Roque.
Ito’y bunsod ng kabiguan niya na hindi pa rin dumalo sa pagdinig ng komite.
Si Mylah Roque ay nagsilbing signatory sa lease agreement sa isang bahay sa Baguio City na pagmamay-ari ng kumpanyang PH2, subsisidiary ng kumpanya ng pamilya Roque na Biancham Holdings.
Dito kasi nahuli ang Chinese nationals na iniuugnay sa Philippine Offshore Gaming Operator (POGO).
Kasabay naman nito binalaan ni Quad Committee co-chair Bienvenido Abante si dating Sec. Roque na sumuko na dahil hahabulin siya ng kamay ng batas.
“Maniwala po kayo; justice will catch up to you sooner or later. It is not a matter of if, but when. As we have always said, the time of reckoning has come.” paalala ni Abante.
Ipina-contempt si Roque sa ikalawang pagkakataon matapos hindi pa rin isumite ang mga dokumento gaya ng SALN, income tax return at deed of sale na nauna na niyang ipinangakong ibibigay sa komite. | ulat ni Kathleen Forbes
