Pinawalang-sala ng Sandiganbayan si Chief Presidential Legal Counsel Juan Ponce Enrile mula sa kasong plunder na isinampa sa kanya noon pang 2014 dahil sa kontrobersyal na Priority Development Assistance Fund (PDAF) o pork barrel scam.
Inilabas ng Sandiganbayan 3rd Division ang hatol ngayong araw, makalipas ang higit 10 taong paglilitis sa kaso.
Abswelto rin sa kaso ang kanyang dating chief of staff na si Gigi Reyes at detained businesswoman Janet Lim-Napoles.
Sa desisyon ng Anti-Graft Court, pinawalang-sala sina Enrile, Reyes, at Napoles dahil nabigo ang prosekusyon na patunayang sila ay “guilty beyond reasonable doubt.”
Kasunod nito, iniutos ng korte ang pag-aalis ng Hold Departure Order (HDO) na nauna nitong ipinalabas laban kina Enrile, Reyes, at Napoles, pati na rin ang bail bond.
Hindi naman na nagpaunlak pa ng panayam sina Enrile at Napoles na umalis din agad matapos na maabswelto sa kaso. | ulat ni Merry Ann Bastasa
