Suportado ni House Speaker Martin Romualdez ang desisyon ng Quad Committee na hindi na ituloy ang kanilang pagdinig ngayong araw, para bigyang daan ang relief efforts para sa mga nasalanta ng bagyong Kristine.
Ayon sa Speaker, bilang mga kawani ng pamahalaan, mahalaga na ang mga mambabatas ay matutukan ang kanilang mga distrito at kababayan.
“We welcome the decision of the Quad Comm as announced by Chairman Ace Barbers. Ang atensyon dapat natin ngayon ay kung paano makakatulong sa ating mga kababayang nasalanta ng bagyo,” sabi ni Romualdez.
Paalala niya, na higit sa lehislasyon ay mas kailangan ngayon ng mga residente ang tulong.
Tuloy-tuloy naman ang paghahanda at pagpapadala ng relief packs ng Kamara matapos ikasa ang malawakang relief operations sa Bicol, Eastern Visayas, MIMAROPA at CALABARZON.
Kabuuang P411 million na halaga ng cash assistance at relief packs ang ipagkakaloob sa 22 distrito na pinadapa ng bagyo salig na rin sa atas ni Pangulong Ferdinand R. Marcos Jr.
“The resources we have mobilized reflect our commitment to respond promptly and with urgency to the needs of those displaced and affected by Typhoon Kristine. We are doing everything in our power to make sure help reaches the most vulnerable,” sabi pa niya. | ulat ni Kathleen Forbes
