Pinuri ni senador Sherwin Gatchalian ang mabilis na aksyon ng Office of the Ombudsman sa paglalagay sa preventive suspension sa mga lokal na opisyal ng Porac, Pampanga kaugnay ng kaso ng pagkakaroon ng POGO hub sa kanilang bayan (Lucky South 99).
Ang pahayag na ito ng senador ay kaugnay ng desisyon ng ombudsman na suspendihin sina Porac Mayor Jaime Capil, Vice Mayor Francis Laurence Tamayo at 8 pang mga konsehal kaugnay ng gross neglect of duty case na inihain ng DILG laban sa kanila.
Umaasa si Gatchalian na magsisilbing leksyon na ito sa mga lokal na opisyal na patuloy na nagkukunsinte ng POGO operations sa kanilang lugar sa kabila ng utos na total ban ni Pangulong Ferdinand R. Marcos Jr.
Binigyang diin ng senador na hindi dapat magpikit-mata ang mga lokal na opisyal sa mga ilegal na aktibidad ng mga kriminal na sindikato sa kanilang nasasakupang lugar dahil tiyak na mananagot rin sila sa kanilang mga aksyon.
Giit ni Gatchalian, obligasyon ng mga opisyal na linisin ang kanilang mga lugar mula sa mgas gawaing labag sa batas. | ulat ni Nimfa Asuncion