Tuluyan nang ipina-contempt ng House Committee on Good Government and Public Accountability, ang ilan sa opisyal ng Office of the Vice President (OVP) na bigo pa ring dumalo sa pagdinig.
Partikular sina Atty. Lemuel G. Ortonio – Assistant Chief of Staff at Chairperson of the Bids and Awards ng OVP; Gina Acosta – Special Disbursing Officer; Atty. Sunshine Charry Fajarda – dating Assistant Secretary ng DepEd at Mr. Edward Fajarda – dating Special Disbursing Officer ng DepEd at ngayon ay nasa OVP
Sa kanilang liham ng paliwanag, sinabi ni Mr. Fajarda na siya ay ipinadala sa CARAGA habang si Ms. Fajarda naman ay bumisita sa satellite office ng OVP sa Panay noong November 5 at November 9.
Kapwa naman kinuwestyon nina Deputy Speaker David Suarez at Sta. Rosa City Rep. Dan Fernandez ang timing ng naturang mga biyahe ng mga opisyal.
Giit Suarez, matagal naman nang alam ni Farjarda na pinapaharap sila sa komite.
“I believe that the topic at hand is so important that a trip to CARAGA can actually be rescheduled just so that he can attend today’s hearing. Natanggap niya naman po yung subpoena sa kanya. At alam niya naman po na previous to the subpoena that was received, he received it also via email. Other than that, he’s been invited numerous times to attend the same hearing in the weeks past. So it is my position, Mr. Chair, that with regards to the letter of Mr. Edward Fajarda, this is unacceptable for the committee, Mr. Chair.” Sabi ni Suarez
Dagdag ni Fernandez tila sinasadyang iwasan ng naturang mga indibidwal ang pagdinig.
“…ang question po natin, di ba nila pwedeng gawin sa ibang araw yung kanilang pagbisita doon sa kanilang Panay, Negros Island? And at the same time, there are no valid reasons why they have to personally visit yung kanila pong opisina doon sa Panay. What is so important in that visitation that was conducted between November 5 and 9? So I think this also evasion, and they’re trying to evade our hearings. And nakakalungkot lang po. They’re trying to run and hide and not to be with us.” sabi ni Fernandez.
Nakakapagtaka ani Suarez na pare-parehas silang umalis at binigyan ng travel order gayong alam naman na mayroong pulong ngayong araw.
“medyo nakakapagtaka dahil pare-pareha silang umalis, pare-pareha silang may travel order, pare-pareha silang pinahintulutan na umalis sa araw na may hearing tayo. Now, it makes me think that there’s actually a malicious intent behind all these reasons and travel orders given to them just so that they can again avoid attending today’s hearing,” dagdag pa ni Suarez
Present naman sa pagdinig ngayong araw sina:
Atty. Rosalynne L. Sanchez – Director for Administrative and Financial Services ng OVP; Julieta Villadelrey – Chief Accountant; Kevin Jerome Tenido – Chief Administrative Officer at; Ma. Edelyn Rabago ng Budget Division Office ng OVP.
Panibagong subpoena naman ang ibinigay sa Chief of Staff ng OVP na si Atty. Zuleika Lopez para sa humanitarian reasons.
Sa kaniyang paliwanag sa komite, nasa Amerika ngayon si Lopez para alagaan ang tiyahin na kritikal ang kalagayan.
Sabi naman ni Suarez, na pagbibigyan nila ng isa pang pagkakataon si Lopez na makaharap ngunit hanggang sa susunod lang nilang pagdinig o papatawan na siya ng contempt. | ulat ni Kathleen Forbes
