Maliban sa relief caravan sa Bicol region ay magkakasa rin ang Kamara ng mini-Bagong Pilipinas Serbisyo Fair.
Ayon kay House Deputy Secretary General Sofonias Gabonada, bilang tugon sa panawagan ni Pangulong Ferdinand R. Marcos Jr., inatasan ni Speaker Martin Romualdez ang pagbuhos ng serbisyo sa mga lugar na sinalanta ng mga bagyo.
Paalala ni Gabonada, kailangan din ng mga biktima ng emergency employment, matignan ang kanilang kalusugan, at iba pang mga serbisyong i-aalok ng gobyerno na dadalhin ng mini-BPSF.
Sabayan aniya itong idaraos sa November 21, na gagawin sa Jessie Robredo Coliseum sa Naga City, Ka-Fuerte Sports Complex sa Pili at BUPC Gymnasium sa Polangui, na may tig-10,000 benepisyaryo kada lokasyon.
Samantala, sa Biyernes, November 22, idaraos naman sa Samar ang huling Bagong Pilipinas Serbisyo Fair ngayong taon.
Ayon sa Deputy Secretary General, aabot sa 180,000 ang target beneficiaries para sa BPSF Samar kung saan 100,000 na pamilya dito ay aabutan ng tulong pinansyal.
Nasa 250 programa ng serbisyo ang dadalhin ng mga makikibahaging ahensya na may kabuuang halaga na kalahating bilyong piso. | ulat ni Kathleen Forbes
