Nagpaalala ang Pamahalaang Lungsod ng Caloocan na mahigpit na ipinagbabawal ang paggamit ng mga iligal na paputok sa lungsod.
Ito ay bilang paghahanda sa ligtas na pagsalubong ng Bagong Taon.
Inatasan ni Caloocan City Mayor Dale “Along” Malapitan ang Caloocan City Police Station (CCPS) at mga opisyal ng barangay na mahigpit na ipatupad ang Executive Order 040-24 at Republic Act 7183.
Ipinagbabawal ng mga kautusang ito ang paggamit ng mga mapanganib na paputok tulad ng boga, trianggulo, baby rockets, Judas’s belt, at whistle bombs. Pinagbawalan din ang mga open-pipe na motorsiklo.
Ayon kay Mayor Malapitan, huhulihin ng mga pulis ang sino mang lalabag sa mga patakaran. Habang itu-turnover sa City Social Welfare Development Department ang mga mahuhuling menor de edad.
Hinimok naman ng Caloocan LGU ang publiko na gumamit ng mga mas ligtas na alternatibong pampaingay sa pagsalubong ng 2025. | ulat ni Diane Lear
