Isang malalimang imbestigasyon ang ikakasa ng Kamara sa susunod na taon kaugnay aa pammahala ng Philippine Health Insurance Corporation (PhilHealth) sa pondo nito.
Sa kanyang talumpati bago mag-adjourn ang sesyon, sinabi ni House Speaker Martin Romualdez na layunin ng pagsisiyasat na humanap ng solusyon at hindi ang manisi.
Kung mapatunayan sa imbestigasyon na underutilized o sobra ang pondo ng PhilHealth ay itutulak nila ang pagpapalawak sa benepisyo para sa mga Pilipino hanggang sa makamit ang target na zero billing sa lahat ng ospital.
Aaralin din aniya nila ang isang taong pagsuspindi sa paniningil ng premium payments kung kakayanin pa rin na maghatid ng serbisyo sa mga miyembro.
Nais din aniya nila mababaan ang premium contributions na sa kasalukuyan ay nasa limang porsyento.
Giit ni Romualdez kung hindi naman makokompromiso ang kapasidad ng PhilHealth ay hahanapan nila ng paraan na mapagaan ang gastusin ng mga miyembro nito.
“Why are we doing this? Because the people deserve no less. PhilHealth exists to provide security and comfort in times of medical emergencies. It should not hoard resources at the expense of its members. If we can alleviate the burden of contributions without compromising its sustainability, we will do so,” ani Romualdez. | ulat ni Kathleen Jean Forbes
